Sakabanaketaren amaiera eskatzeko elkarretaratzea izango da ostiralean Laudion

Espetxe politikak ez du atsedenik ematen, bere aplikaziotik eratorritako eskubide urraketa lazgarria etengabekoa baita. Horren eredu argia dira Aranjuezen dagoen Asier Aginako presoaren bi senideek pairatutako istripua –bizkarreko lesioak eragin dizkiena- eta Pablo Gorostiagak hiltzera zihoan bere emaztea azkeneko aldiz bisitatzeko aukera ez izatea. Laudioko bizilagunak, 70 urte baino gehiago ditu eta Herrera de la Manchako espetxe urrunean preso, koman zegoen bere bikotea zen Judith Uriarte bisitatu ahal izateko baimena eskuratu zuen duela astebete baino gehiago. Baina, baimen hori izan eta trasladatua izateko denbora nahikoa izan arren, Gorostiagak ezin du Judith Uriarte berriro ere bizirik ikusi ahal izan.

Gertatutakoa erabat krudela eta arbuiagarria izateaz gain, euskal jendartearen gehiengo baten bake eta konponbide nahiaren kontra jotzen du. Aginakoren senideek pairatutako ezbeharra zein Gorostiagak sufritutako egoera bortitzak, sakabanaketa politikoan dute sorburua. Giza eskubideak urratzen dituen neurri arbitrarioa da dispertsioa, euskal jendartearen baitan gehiengo zabal baten nahiaren kontrakoa eta nazioarteko hainbat eragile eta instituzioek salatutakoa. Irakurketa sinplea da, euren eskubide zibil guztiak indarrean dituzten presoen senide eta lagunek astebururo ehunka kilometro egitera behartuta egongo ez balira, istripu, zauri eta heriotza arrisku modu nabarmenean jaitsiko litzateke. Eta, Gorostiaga Euskal Herrian egongo balitz, Judith Uriarte bizirik agurtzeko aukera izango zukeen. 

Sufrimendu eta eskubide urraketa guztiekin amaitzeko garaia da. Bake eta konponbidearen bidean, euskal jendartean erronka kolektibo erraldoia du begien aurrean: Sakabanaketa politikarekin behingoz amaitzea. Astebururo, milaka euskal herritarren pairatu behar duten minari, arriskuari eta giza eskubideen urraketari aurre egitea. Europar Batasunaren testuinguraren baitan, edozein oinarri etiko eta giza eskubideen aurka jotzen duen salbuespen neurri honen aplikazioa ez da onargarria. Hortaz, ezinbestekoa da, sakabanaketaren aurkako ahalik eta borondate gehien biltzea, amankomuneko lan espazioak sortzea eta bizitza soziala dagoen gune guztiak aldarri honekin blaitzea. 

Horiek horrela, gertatutako salatu eta berriro ere gerta ez Darin eskatzeko, Herrirak elkarretaratzea deitu du ostiral honetan Laudion. Hitzordua 19:30ean izango da Plazan, “Sakabanaketarekin amaitu, euskal presoak Euskal Herrira” lemapean.

Presoen bi senitarteko zauritu aurtengo zazpigarren auto istripuan

Aranjuezko kartzelan preso den Asier Aginako durangarraren amak eta lehengusinak izan zuten auto istripua atzo, astelehena, aurrez-aurreko bisitara bidean. Ezbeharra goizeko 10etan izan zen Madrileko Guadalix de la Sierra udalerriaren parean, errepidearen estugune batean lur orotako ibilgailu batek atzetik jo eta bidetik atera zituenean. Senide biak ospitalera zuzendu ostean eta zegozkien probak egin eta gero, jasotako kolpeak eragindako lesio zerbikal eta lunbarra diagnostikatu zieten. Aurrez-aurreko bisita gabe geratu ziren eta kotxeak kalte handiak izan zituen. 

Honakoa sakabanaketaren ondorioz, senide eta lagunek aurten pairatzen duten zazpigarren istripua da; 17 lagunek izan dituzte istripu hauek. Algortan ondo baino hobeto ezagutzen ditugu sakabanaketa politikaren ondorioak: Antonia Hernandez Rodriguez, etxean preso zegoela orain ia hiru hilabete hilik aurkitutako Anjel Figueroa Fernandez algortarraren amama, 1997ko martxoaren 14an hil zen auto istripu batean Alcala-Meco espetxera bidean, bere biloba bisitatzera zihoanean. 75 urte zituen hil zenean.

Euskal preso politikoen senide eta lagunak milaka kilometro egitera behartuak direla astebururo dispertsio politikaren eraginez, Etxerat elkarteak salatu duenez. Istripuak, osasunaren hondatzea, eta 16 kasutan ere, heriotza errepidean..., hau da, egungo espetxe politikak dakarren kalte-ordaina legez dagokigun bisita eskubidea gauzatzeko. Etxeratek dispertsioan oinarritutako espetxe politikarekin bukatzea eta senide zein presoei dagozkien eskubideak errespeta daitezen aldarrikatzen du.

Sakabanaketarik ez!
Euskal presoak Euskal Herrira ORAIN!

“Zigorren herria”: 197/2006 doktrinaren kontrako kantu bat aurkeztu dute zenbait musikarik

Kanta deskargatzeko: HEMEN

Vendetta musika taldeak, Ines Osinaga (Gose), Zuriñe Hidalgo (Hesian) eta Xabi Solano (Esne Beltza) kantariak lagun, 197/2006 doktrinaren kontrako kantu bat grabatu du, “Zigorren herria” izenburupean. Zuzenean aurkeztuko dute datorren irailaren 14an, Herrira-k Herritarron Epaia plazaratzeko antolatu duen ekitaldian. Kantuak John Lennon abeslariaren “Give peace a chance” du oinarri musikan, birmoldaketa Pello Reparaz-ek sortu du eta hitzak Jon Garmendia “Txuria” euskal iheslari politikoak idatzi ditu. Ipar Euskal Herrian grabatu dute, Paxkal Etxepareren estudioetan, eta Pariseko Source Mastering estudioetan masterizatu. 

Abestiak irailaren 14ko ekitaldiari amaiera emango dio, hainbat musikarik eta sektore desberdinetako kidek kantatuta, dagoeneko Iruñeko Anaitasuna kiroldegian izango direla adierazi baitute. Ikusleek ere parte hartzea pentsatuta dago, eta irudi horiekin bideoklip bat grabatzea, Europara Herritarron Epaiarekin batera bidaltzeko. 

Horretarako, Herrira-k kantua eta hitzak jasotzen dituen bideo hau zabaldu du, eta gonbita luzatzen die herritar guztiei Anaitasuna kiroldegira joateko eta abestia ensaiatzen denbora tartetxo bat emateko. Helburua 2.000 laguneko abesbatza lortzea da, errepika hau batera kantatzeko: “All we are saying is give peace a chance”.

Herritarron Epaiak alderdi, sindikatu eta eragile sozialen ekarpenak bilduko ditu aste honetan

Argazkian, Iñaki Gonzalo Casal "Kitxu" itzubaltzetarra da egun 197/2006 doktrina ezarrita daukan eskualdeko preso bakarra.

197/2006 doktrinaren kontrako Herritarron Epaia azken txanpan da. Aste honetan, Herrirak bi ekitaldi antolatu ditu alderdi, sindikatu eta eragile sozialen ekarpenak biltzeko. Lehenbiziko hitzordua asteazken honetan da, Bilbon, 19:00etan, Kafe Antzokian, eta bigarrena Iruñean, ostiralean, 19:00etan, Sarasate pasealekuan. 

Eragile askok adierazia dute ekitaldietan egongo direla, eta haietako bakoitzaren ordezkariak bere ekarpena egingo dio Herritarron Epaiari. Bestetik, Bilboko ekitaldian 197/2006 doktrinaren kontrako film labur bat aurkeztuko da. Filmaren zuzendaria Gotzon Sanchez da, eta Oihana Maritorena, Eñaut Gantxegi, Itziar Rekalde eta Carlos Olalla madrildarra dira aktoreak. Horrez gain, Josu Bergara abeslariaren emanaldia izango dugu bertan. 

Herritarron Epaia koaderno handi bat da, uda honetan Euskal Herriko bazterrak bisitatzen ari dena 197/2006 doktrinaren kontrako aportazioak biltzeko. Ibilbidearen azken plaza Iruñeko Anaitasuna kiroldegia izango da, irailaren 14an. Sorpresaz betetako ekitaldia antolatu du Herrira-k, eta, bertan, jendaurrean emango du bere epaia Europako erakundeei bidali baino lehenago.

Ekimen honen bitartez –Inés del Ríoren errekurtsoari buruz Europako Giza Eskubideen Auzitegiak hemendik gutxira emanen duen epaiaren harira antolatua–, Herrira-k aditzera eman nahi du kasu honetarako epaia emana dagoela. Epaiak badu alde juridiko bat, 2012ko uztailean Estrasburgoko epaian aho batez adierazia, baina, batez ere, badu alde soziala ere, gehiengo politiko, sindikal eta sozialarena, garbi eskatu baitu giza eskubideen errespetua eta 197/2006 doktrinaren indargabetzea.

Argazki lehiaketa antolatu dute Monterroxoko presoek

Argazkian, behean, eskuinean, Endika Lejarzegi algortarra, Monterroxoko gainontzeko euskal preso politikoekin batera.

Jakingo duzuenez, euskal preso politikoak urtean zehar borroka mota ezberdinak buruten dituzte beraien eskubide urratuen alde, bai espetxe erakundeari nola Euskal Herriari zuzenduak izaten direnak. 

Amnistiaren bidean, besteak beste, eskatzen dute: estatus politikodun presoak direla onartzea, dispertsioarekin bukatzea, preso gaixoen kaleratzea, bizi arteko zigorra ahalbidetzen duen 197/2006 doktrina derogatzea eta zigorra bete duten kideen kaleratzea, 3/4k edota 2/3ak beteak eta baldintzapeko askatasunaren epeetan dauden kideen kaleratzea... salbuespenezko neurrien desagerpena, alegia.

Oraingoa, Monterroxoko (Galizia) espetxeko EPPKko presoei kalea eta kartzelaren arteko harremana egiteko asmoz, honako ekimen hau egitea bururatu zaie: 

Argazki txapelketa: 

• Saria. Bertoko kideak egindako eskulan bat. 
• Parte hartzeko. Zuen argazki bidali bakarka edo taldeka zure izena eta helbidearekin batera. Argazkiak honakoa jasotzen duzutenetik iraila bitartean igorri, jasotzen ditzten guztien artean zozketa bat egingo dute irailaren bukaeran. 

Bitartean, preso eta errefuxiatuen aldeko mobilizazioetan parte hartzera deitu dute Monterroxoko presoek. 

Endika Lejarzegi 

C.P. Monterroxo 

27568 Monterroxo 

Monterroxo Getxotik 600 kilometrotara dago. Bertan, euskal preso politiko hauek daude: Ibai Aiensa Laborda, Mikel Aiensa Laborda, Bigarren Ibarra Izurieta, Endika Lejarzegi Olabarrieta, Kepa Rezabal Zurutuza, Juan Jose Zubieta Zubeldia, Kepa Zubizarreta Balboa.

Endika Lejarzegik helarazitako gutuna:

Portu Zaharreko jaietan ere gurekin gura ditugu!

Plentzian jende katea egin dute presoen sakabanaketaren aurka

Atzo, igandea, "Senideak izateagatik zigortuak. Etxean nahi ditugu!" lelopean, jende katea egin zuten Plentziako hondartzan. Etxerat elkartearen ekimena goizeko 12etan abiatu zen Plentziako metro geltokian, bertatik hondartzara joan eta euskal preso politikoen sakabanaketa eta politika horren ondorioak, tartean auto istripuak eta heriotzak, salatzeko. Uribe Kostako hiribilduaz gain, salaketa Laida, Zarautz, Donostia eta Hendaiak ere hartu zituen. Izan ere, atzoko mobilizazioaren bidez, gatibuen senitartekoek pairatzen dituzten ondorioak zabaldu nahi zituzten. Etxeraten ustez, presoen sakabanaketa eta horren ondorioak ez dira senideen erantzukizuna, ezarri egiten dieten behar bat baizik. Hori dela eta, gogor kritikatu dute Angel Yuste Espetxe Erakundeetako idazkari nagusiak ekainaren 25ean Espainiako Kongresuan esandakoa, sakabanaketaren ondorioz gertatzen diren errepide istripuen erantzukizuna presoak bisitatzera joaten direnei leporatu zienean. 

Azken datuen arabera, egun 599 preso politiko daude 79 espetxetan sakabanatuta, tartean 30 uribekostar. Euskal Herrian hamar soilik daude. Preso kopururik handiena euren etxeetatik 800-900 kilometrora dago, eta ondorioz, senideek 1.300 kilometro inguru egin behar izaten ditugu astebururo. Sakabanatze horrek tentsioa, neke izugarria eta izugarrizko ondorio psikologikoak eragiten ditu. Ondorioak askotarikoak izan daitezke, baina lazgarriena heriotzarena da. Izan ere, errepidean hamasei senide eta lagunek bizitza galdu dute. Tartean, Anjel Figueroa Fernandez algortarra zenaren amama, Antxoni Fernandez, 1997ko martxoaren 14an Alcala Mecora bisitan zihoazela. Sakabanaketak eragiten duen beste ondorioekin jarraiki, ekonomikoa ere gogoratu du Etxeratek. Elkartearen datuen arabera, astebururo batez beste 377,94 euroko kostua eragiten die familia bakoitzari; urtean, 19.653 euro.

Paella Egunean ere gurekin gura ditugu!

Kartela jaitsi eta zabaldu (jpg)

Erosi preso eta iheslarien aldeko kamiseta!

Kartela jaitsi eta zabaldu (jpg)

Aitzol Gogorza eta larri gaixo dauden presoen askatasuna eskatzeko elkarretaratzeak bihar Bilbo eta Errenterian

Larri gaixo dagoen Aitzol Gogorza preso politiko oreretarraren ospitaleratzearen ondoren, Herrirak bere eta eritasun larriak dituzten gainontzeko 15 euskal preso politikoen askatasuna eskatzeko elkarretaratzea egingo du bihar Basurtuko ospitalean. Horrekin batera, arratsaldean, Errenterian beste hitzordu bat antolatu dute eta goizean Oarsoaldeko herritik autobus bat bete da Bilboko elkarretaratzera joateko. 

Deialdiak: 

Goizekoa 

Eguna: Uztailak 12, ostirala 

Ordua: 11:00etatik 12:00etara

Lekua: Basurtuko ospitalea (Bilbo)

Arratsaldekoa 

Eguna: Uztailak 12, ostirala 

Ordua: 20:00etan 

Lekua: Zumardia (Errenteria)

Herrira mugimendua: "Yusteren hitzek milaka euskal herritarrenganako errespetu falta izatez gain, sufrmenduaren estrategian sakontzen dute"

Herriraren aburuz, Espetxetako Zuzendaritzako idazkari nagusi den Angel Yustek Espainiako Kongresuan gaur egindako adierazpenak onartezinak dira. Are gehiago, sufrimendua eta oinazea besterik eragiten ez duen salbuespeneko espetxe politika honen ondorio zuzenak pairatzen dituzten milaka euskal herritarrenganako errespetu falta ikaragarria suposatzen dute. 

Yusteren hitzek sufrimenduaren estrategian sakontzen dute eta bai presoen bai euren ingurune hurbil osoa arriskuan jartzen duen errusiar erruletaren apología garbia dira. Izan ere, ezin dugu ahaztu sakabanaketak edo espetxe barruan emandako osasun asistentzia desegokiak hamarnaka euskal herritarren bizitzarekin amaitu dutela. 

Indarrean dagoen espetxe politikak giza eskubideak era nabarmean urratu eta ondorio atzeraezinak eragiten ditu. Giza eskubide guztiak errespetatu eta konponbidea zein bake justu bat lortu ahal izateko ezinbestekoa da espetxe politikaren aldaketa. Hala eskatzen dute euskal jendartearen gehiengoak zein nazioarteko hainbat eragile eta instituzioek. 

Horiek horrela, euskal herritarren gehiengoaren nahien aurka jotzen duten adierazpen eta probokazioen aurrean, nahitaezkoa da espetxe politikaren aldaketa erdiesteko adostasun berriak josi eta sentsibilitate ezberdinetako pertsona, eragile edo sektoreen arteko akordioak lotzea. Bide horretatik, zein konpromisoa eta mobilizazioaren bitartez, lortuko baitugu espetxe politikak suposatzen duen oztopo lazgarria gainditzea. 

Yusterena bezalako adierazpen arduragabeek ez dute justifikaziorik, sufrimendua eta giza eskubideen urraketak atzean uzteko garaia da. Euskal jendartearen gehiengo zabalaren nahia bakea eta konponbideari aukera bat ematea da. Bide horretan, espetxe politikaren aldaketa gako nagusienetako bat izanik, Herrirak mobilizazioak deitu ditu ostiral honetan Euskal Herriko hiri eta herri guztietan. Hortaz, herritarrei bertan parte hartzeko gonbitea luzatzen diegu. 

Giza eskubideak. Irtenbidea. Bakea. Euskal presoak Euskal Herrira 

Eskerrik asko 

Herrira

Naiz.info: Yuste responsabiliza a los familiares de los presos de los accidentes por la dispersión

Etxerat: "Angel Yustek gaur Espainiako Kongresuko Barne gaietako Batzordean egindako adierazpenen harira"

Argazkian, sakabanaketak eragindako istripu bat salatzeko Etxeratek emandako prentsaurrekoa / © Etxerat

Gaur, Angel Yustek sakabanaketa senide eta lagunon ardura dela esanez emandako erantzunak, argi eta garbi erakusten du senide eta lagunon aurka diseinatutako salbuespeneko neurri bat dela. 

Oso larriak dira gaur Yustek egindako adierazpenak. Sakabanaketa ez da gure ardura, baizik eta ezartzen zaigun behar bat da. Gure senide eta lagunak, maite ditugunak, ikusteko dugun eskubidea eta eurak gurekin komunikatzeko duten eskubidea urratzen duen obligazio bat da. Eta beraz, gure bizitzak arriskuan jartzera behartuak gaude, gure osasuna milaka kilometrotako bidaietan galduz, desgaste ekonomiko izugarria jasanez. Zenbait kasutan euren mendekuzko politika honek hildakoak ere eragin dituelarik, sakabanaketak 16 biktima eragin baititu. Eta sakabanaketa justifikatzen dutenek edo honen aurka geldirik daudenek senide eta lagunoi ezartzen zaigun kondena lazgarriarekin bat egiten dute, gure eskubideak guztiz zapalduz. 

Hortaz, gure eskubideak urratu eta sufrimendua areagotu besterik eragiten ez digun sakabanaketa euskal gizarte osoaren ardura da. Eta ardura honen banaketa honetan, uste dugu alderdi politiko orok interesa agertu beharko lukela salbuespeneko espetxe politika hau eta dituen ondorioak ezagutzeko. 

Senide eta lagunok, sakabanaketa ezartzen hasi zenetik onartu genuen berau salatzeko eta salbuespeneko neurri honek suposatzen duen eskubide urraketa agerian uzteko ardura. Etengabe egin ditugun eta egiten ditugun salaketek, ordea, ez dute oihartzunik izan, ez bada gu kriminalizatzeko izan. Horregatik, Amaiurri eskertu nahi diogu guri isiltzen diguten hau, publiko egiteagatik. 

Eta noski onartzen dugu gure ardura dela sakabanaketaz hitz egitea, nahiz eta ez den gure ardura soilik. Orduan, Yuste jaunak sakabanaketaren inguruan gurekin hitz egin nahi duela, esan nahi al du? 

Etxerat elkartea

Naiz.info: Yuste responsabiliza a los familiares de los presos de los accidentes por la dispersión

Ekaineko Azken Ostirala 2013: Gazte borrokaz preso eta iheslariak etxera!

Kartela (jpg) jaitsi eta elkarbanatu

Kitxu eta Aimarren urtebetetzeak. Zorionak!

Iñaki Gonzalo Casal "Kitxu" preso politiko itzubaltzetarrak larunbatean, ekainak 15, egin zituen 49 urte. Aimar Hidalgo Lertxundi gatibu algortarrak, berriz, datorren astelehenean, ekainak 24, egingo ditu 34 urte.

  

Aukera ona ere bada, postal, gutun edo zerbait bidaltzeko, urteak egiteaz batera beren konpromisoan eredugarri dugun pertsona berezi hauei zorionak eta eskerrak eman eta gure elkartasuna adierazteko.

Zorionak Kitxu. Zorionak Aimar. Eskerrik asko erakusten duzun adore eta kemen horregatik!

Helbideak:

Iñaki Gonzalo Casal
C.P. Villanubla
47011 Villanubla (Valladolid)

Aimar Hidalgo Lertxundi
C.P. Herrera de la Mancha
Ctra. de Argamasilla, s/n

13200 Herrera de la Mancha (Ciudad Real)

Euskal Iheslari Politikoen Kolektiboa (EIPK): "Konponbide garaia da, inoiz inork bere sorterritik ihes egin behar ez izateko"

Miarritzeko ekitaldia osorik

Elkartasunaren hatsa nagusitu zen larunbatean Biarritzen. Emozioz betetako eguna, ekitaldi hunkigarria. Iheslarien arazoa ez da konpontzen egoera pertsonala zuzenduz, baizik eta ihes egitera bultzatu zituzten arrazoiak gaindituz. EIPK-k konponbiderako bere proposamena jarri du mahaigainean herriaren aitzinean.

EIPKren ekarpena (pdf)

Bihar iheslariekin izateko autobusean izena ematea badago oraindik

Argazkian, Alfontso Etxegarai Plentziako deportatua 27 urte daramatza erbestean / cc-by-nc-nd Josu Martinez eta Txaber Larreategi - Gite-Ipes - Eguzki Bideoak.

Euskal Iheslari eta Deportatu Politikoen Kolektiboak larunbat honetan, ekainak 15, Miarritzeko Irati erakustazokara hurbiltzeko deia luzatu du, bertan "Herria dugu arnas" nazio ekimenaren "Elkartasun Hatsa" ekitaldia antolatu dutela. Ernai eta Herrira erakundeek bat egin dute ekimenarekin. Algorta-Getxoko Ezker Abertzaleak zabaldu duenez, hasiera batean bi autobus antolatuko zeuden Uribe Kostatik, baina eskaria txikia izan dela ikusita bakarra aterako da azkenean. Zerrendak ohiko lekuetan jarri dira, Algortako kasuan Abian Kultur Elkartean. Norbaitek joateko asmoa baldin badauka ahalik eta lasterren izena eman (946 566 851) beharko du. Ordutegia hurrengoa da: irteera, goizeko 9etan Telletxetik eta, itzulera, 18:00etan Miarritzetik (Irati erakustazoka).

Euskal Iheslari eta Deportatu Politikoen Kolektiboak "hausnarketa prozesu zabala burutu du azken garaian eta estatuen blokeoa aldebakarreko pausuen bitartez gainditzeko hautua egin" du, Herriraren arabera. Bide horri hasiera emateko, abian jarri du “Herria dugu arnas” ekimena. Munduko bazter anitzetan ehunka iheslari daude, eta Euskal Herrian libre bizitzeko eskubidea jorratu nahi dute, mundutik herrira itzuli. Iheslari eta Deportatu Politikoen Kolektiboak gatazkaren konponbidean ekarpen politikoa egin dezan eta haiek babesteko ekimena da larunbateko Elkartasun Hatsa izeneko ekitaldia. Egun osoko egitaraua izango du:

• 11:30ean ekitaldi politikoa.
• 13:30ean bazkari herrikoia.
• 19:00etan kontzertua: Gatibu, Gose, Iheskide eta Ze Esatek!

Iheslariek duintasunez bizitzeko eskubidea dute

Euskal Herrian aski ezaguna da euskal preso politikoek pairatzen duten giza eskubideen urraketa, beraiei ez ezik euren senide eta lagunei ere sufrimendua eragiten dieten salbuespen neurri eta espetxe politika ankerraren ondorioz. 

Horiek horrela, agerikoa da euskal jendartearen gehiengo zabal batek, Espainia eta Frantziako gobernuek indarrean mantentzen dituen salbuespen neurriak eten eta konponbide klabeetan oinarritutako espetxe politika aplikatzea eskatzen duela. Euskal Herrian giza eskubideen errespetua bermatu eta konponbide eta bake justu bat erdiesteko beharrezko urratsa da hau. 

Gatazkak sorturiko ondorioen zerrenda luzean, euskal iheslari politikoen errealitateaz hitz behar dugu ezinbestean. Ehunka dira munduan zehar barreiaturik dauden euskal herritarrak eta haien egoerari irtenbidea ematea beharrezkoa da. 

Herriraren aburuz, urte luzetako sufrimendua atzean utzi eta konponbidearen bidean aurrera urratsak emateko, aurreneko pausoa pertsona guztien giza eskubideak errespetatzea da. Norabide honetan, oinarrizkoa da iheslari guztien eskubideak errespetatzea eta duintasunez bizitzeko aukera izatea. 

Ehunka euskal herritar dira, euren herritik kanpo 5, 10, 20 edo 30 urte daramatzatenak, familia eta lagunak milaka kilometrotara dituztela, kasu batzutan ozeanoa ere tartean dela. Haietako bakoitzaren kasua berezia da, baina haien artean paperik gabeko pertsonak ditugu, helbide legalik gabekoak eta sarritan zailtasun handiak dituzten osasun asistentzia eta zerbitzu egokiak jasotzeko. Ez dute lan arautu bat izateko aukerarik eta maizegi muturreko egoera latzetan bizi dira. Horien artean, deportazioan bizitzera behartuak izan diren hainbat euskal herritar, inolako babes juridikorik gabe Euskal Herritik milaka kilometrotara urrundutakoak. 

Pairatzen duten jazarpena erabat zailtzen du Euskal Herriarekin duten harremana zein euren eguneroko bizitza. Salbuespen neurri berezituen jo mugan bizi dira: besteak beste, lege berezien menpeko atxiloketak, gerra zikina, entregak, euroaginduak, estradizio prozedurak, konfinamenduak… 

Neurri berezi guzti hauek, sufrimendua eragiten duten iheslariengan eta baita beraien ingurune hurbilean ere. Egoera hauek iraganean uztea beharrezkoa da konponbide eta bake egoeran aurrera egiteko. 

Bide honetan, iheslari politikoen kasuan bi lehentasun ezarri ditu Herrira mugimenduak: Duintasunez bizitzeko eskubidea bermatzea eta jasaten dituzten salbuespen neurriak indargabetzea. 

Pertsona hauen salbuespen egoera gizarteratzeko eta haien giza eskubideak errespetatu beharra euskal gizarteari helarazteko konpromisoa du Herrira mugimenduak.

Bi uribekostar izango ditu iheslari politikoen mintzakidetza taldeak

Argazkian, iheslarien aldeko aldarria Algortan, artxiboko irudian / cc-by Ukberri.net

Euskal Iheslari Politikoen Kolektiboak 14 solaskideren izenak ezagutarazi ditu asteazken honetan, Espainiako eta Frantziako gobernuek gatazka politikoaren konponbidean kontuan har ditzaten. Baionan eskainitako prentsaurrekoan, Kizkitza Gil de San Vicente, Jon Irazola, Lurdes Mendinueta eta Eulogio Talavera kolektiboko kideek hitza hartu dute, prozesuko eragile aktiboak izateko duten eskubidea eskatuz, eta kontuan hartzeko dei egin diete bi estatuei eta eragile sindikal eta politikoei. Horrela, gogoeta luze baten ondoren 14 ordezkari izendatu dituztela jakinarazi dute. Horien artean dira Alfontso Etxegarai iheslari plentziarra (Afrikako Sao Tomen deportatuta) eta Rakel Garcia sopeloztarra 1992tik Belgikan, Flandrian, errefuxiatua. Ondokoak dira gainontzeko mintzakideak: Tomas Linaza (Cabo Verden dagoena), Josu Lariz (Uruguai), Josu "Txutxo" Abrisketa (Kuba) eta Ipar Euskal Herrian dauden Eloy Uriarte, Lourdes Mendinueta, Jokin Aranalde, Jon Irazola, Oxel Azkarete, Jon Garmendia "Txuria", Xabier Miguel Ezkerra, Xabier Arin eta Idoia Espiaz. Baionan egin duten agerraldiak bi xede zituen: batetik, ordezkaritza hori aurkeztu, eta, bigarrenik, sostengua adierazi hainbat eragilek larunbat honetarako Miarritzeko Irati aretoan antolatu duten Elkartasun Hatsa izeneko ekitaldiari. Horretara joateko bi autobus izango dira Uribe Kostan.

Horiek guztiak izango dira Euskal Iheslari Politikoen Kolektiboaren ordezkariak, eta, prentsaurrekoan azaldu dutenez, haiekin "hitz egin beharko dute zuzenean, gatazka politikoa konpontzeko". Horrela, "gatazka politikoa konpontzeko orduan, iheslariak kontuan hartzea" eskatu diete Espainiari eta Frantziari. "Iheslari politikoekin hitz egin behar da euskal gatazk politikoa osotasunean konpontzeko, gordiar korapiloaren parte izanik, askatzeko modurik zuzenena eta errazena delako", adierazi dute. Kizkitza Gil de San Vicente nabarmendu du "ezinbestekoa" dela euskal iheslari politikoekin hitz egitea, gatazka politikoaren konponbideak "dudarik gabe exijitzen duelako" prozesuaren "partaide" izan behar duen kolektiboaren "hitza" kontuan izatea. Gainera, Gil de San Vicentek azaldu du "azken urteotan" egindako prozesu "zail" baten ondorioz aukeratu dituztela solaskideak, eta eztabaida zaila izan dela zehaztu du, haietako asko kontinente ezberdinetan daudelako.

Larunbatean Miarritzen

Bestalde, Euskal Iheslari Politikoen Kolektiboak Miarritzen larunbat honetan "Elkartasun Hatsa" goiburupean egingo den ekitaldian parte hartuko duela iragarri dute, kolektiboaren ahotsa entzunarazteko. Ildo horretan, Lurdes Mendinuetak esan du iheslariak bertan izango direla gatazka politikoa konpontzeko bere proposamena mahaigaineratzeko. Halaber, euskal jendarteari parte hartzeko deia egin die.

Anjel Figueroaren heriotzaren salaketa egin dute NBEren Giza Eskubideen Kontseiluan

Europa Hirugarren Mundua Zentruak (CETIM) ahozko deklarazioa egin zuen joan den ostiralean Giza Eskubideen Kontseiluko 23. saioan, Nazio Batuek Ginebran duten egoitzan. Deklarazioan, nazioarteko erakunde honen aurrean estatus kontsultiboa duen eta Ginebran egoitza duen elkarte honek gaixotasun larria duten presoen inguruko beraien kezka adierazi zuen. Bereziki, martxoan hildako bi preso politikoen inguruan egin zuen salaketa, Anjel Figueroa Fernandez algortarra eta Xabier Lopez Peña galdakoztarra, eta eskatu egin zuen espainiar eta frantses gobernuei exijitzeko gaixo dauden presoak askatu ditzan. Izan ere, "gaixotasun larriak pairatzen dituzten preso politikoei askatasuna ukatzea, giza duintasunaren aurka joateaz gain, beraien osasunerako eskubidea urratzen du". Modu berean, presoen aurkako salbuespenezko neurriekin bukatzeko eskatu zuten, dispertsio politika bereziki aipatuz, berau "justifikazio gabeko politika krudel honek familiak amaigabeko bidaiak egitera behartzen dituelako bere senideak ikusi ahal izateko". Modu berean, CETIMek Giza Eskubideen Kontseiluari eskatu zion "bi estatu hauetan mekanismo egokiak martxan jartzeko, euskal preso politikoek pairatzen dituzten eskubideen urraketak aztertzeko". Martxoko Giza Eskubideen Kontseiluko saioan, euskal preso politikoen kontrako neurriak salatzen zituen idatzizko agiria aurkeztua izan zen.

Anjel, Xabier, gogoan zaituztegu!

Preso gaixoak kalera orain, baldintzarik gabe!

Tafallan abiatu da 197/2006 doktrinaren aurkako Herritarron Epaia

Argazkian, Iñaki Gonzalo Casal "Kitxu" itzubaltzetarra da egun 197/2006 doktrina ezarrita daukan eskualdeko preso bakarra.

Larunbatean abiatu zen Herrira mugimenduak sortutako “Herritarron Epaia” ekimen ibiltaria. 197/2006 doktrina salatu asmoz eta Euskal Herrian bakeari aukera bat eman behar zaiola beste behin aldarrikatzeko, Epaiak herritarren ekarpen grafikoak jasoko ditu irailaren 14a bitartean. Egun horretan, ekimenaren amaiera ekitaldia izango da Iruñeako Anaitasuna Pabiloian. Besteak beste, Iñaki Gonzalo Casal "Kitxu" preso politiko itzubaltzetarrari 197/2006 edo Parot ezizenez ezaguna den doktrika aplikatu zioten otsailean. Getxo eta Egin irratietako kazetari izandakoa, 1994ko urriaren 25ean atxilotu zuten Areetako Bizkaiko Zubiko plazan, Andoni Muñoz urduliztarra, eta Algortako Iñigo Otazua "Oti" zein etxean preso zeukatela orain ia hiru hilabete hilik aurkitutako Anjel Figueroa Fernandezekin batera. Ekintzarik burutu ez zuen Lanbroa komandoko kideak izatea leporatu zieten lauei, 30 urteko zigorra ezarriz. Egun Valladolideko espetxean, 19 urte daramatza preso. Irteera data 2013ko maiatzaren 4rako bazuen ere, 197/2006 doktrina ezarri diote.

 Iniziatibaren hasiera Tafallan izan zen. Bertako Udal Plazan, dozenaka herritar eta eragilek beraien ekarpenak egin zituzten. Berebiziko sinbolismoa du hautu honek, izan ere Tafalla Ines del Rioren jaioterria da eta ezaguna da Europako Giza Eskubideen Auzitegiaren Areto Nagusiak bere kasua eta 197/2006 doktrinaren inguruko erabaki definitiboa plazaratuko duela hurrengo hilabetetan. Horiek horrela, Herriraren aburuz euskal jendarteak aspaldi eman du bere epaia, 197/2006 doktrina eta euskal preso politikoei aplikatzen zaizkien salbuespeneko neurriekin amaitu beharra dago konponbidera eta bakera hurbilduko gaituzten urratsak eman ahal izateko. Tafallako ekitaldia eta gero, Euskal Herria osoko 80 herri eta hiri zeharkatuko ditu ekimen ibiltariari honek. Herritarrek Epaiari ekarpenak ahal izango dizkiote ekimena euren bizilekuetatik igarotzen denean.